HALIMUN KANDEL

WARSINI téh budak kelas lima SD nu aya di lingkungan kebon entéh Paranggong, Ciwidey. Manéhna boga cita-cita, lamun geus déwasa hayang digawé jadi guru. Salila manéhna diajar, loba ditinggalkeun ku guru. Nu jadi sabab, loba guru anu teu betah ngumbara di lembur singkur. Tempatna mencil. Jauh ka ditu ka dieu. Jaba can aya listrik. Henteu beurang henteu peuting, hawa pagunungan téh teuing ku tiris. Sapopoéna ukur halimun kandel anu mindingan alam. Ceuk manéhna, lamun geus gedé jadi guru, eudeuk keyeng ngajar barudak urang Paranggong. Maranéhna halabhab ku élmu, tapi euweuh nu junun ngatik ngadidik urang lembur.